| bwb's profilea_iPhotosBlogLists |  Tools  Help |
|
a_iSing for the moment November 03 万圣节前后第三个Halloween，终于做咗稍稍应节嘅事。去咗个几钟头开外嘅一间以Party School之名显赫嘅Ohio University，参加号称全国第三大嘅游行。话就係游行，其实两个街口咁多地方，由头到尾10分钟行完，规模同教育路个中心花市当然无得比。而乐趣不在于绝对速度，而在于相对速度：果群周围同你一齐行来行去但着到鬼五马六嘅人。死神猫女维尼之类免提，有一堆唔同形状嘅俄罗斯纸皮，痴满灯泡仔嘅变形金刚，浅绿色从头包到脚响度对打嘅山寨“小小”，一行5个唔同时期造型嘅Forrest Gump，涂黑块面举住个冠军奖杯嘅Jordan，净係一条T-back嘅猛男，比两只鬼追住嘅食豆Pac Man，仲有开住识得自己郁嘅威尼斯船仔的船夫，之类。
或者仲会有更多，可惜同行大部分人对此嗤之以鼻。于是在我觉得高潮到来之前，即係10点左右，打道回府。或者其中一个人嘅意见颇有代表性：乜唔係游行架？净係自己行嚟行去，咁有乜意思呢？所以再次证明宁缺勿滥，只係响US呢个特殊环境好容易犯呢种错误而已。当然我唔係有意见，一切都睇场合，就如着装一样，即使对西装无意见，都无理由着住嚟打篮球。
秋天到，唔知有无关系，谂嘢多咗。上网漫无地浏览嘅时间大幅度减少，反而学深沉开始睇下文字，当然係中文，然后有种旧情复炽嘅感觉。当然个性张扬嘅年代，写作不免要装逼，不得不一边忍受果种所谓“文人相轻”嘅论调，一边收刮可以令我都装埋一份嘅资本。但结果令我十分惭愧，净係“一日三摩挲，剧于十五女”呢句嘢，我又谷歌又baidu之后，只好自认已经俗到无法触碰其真谛嘞……
同时，装逼呢个词，我竟然谂唔到粤语有边个词可以替代……
睇咗新一集麦兜，后半段我已经唔知佢想表达乜嘢，只可以将前半段嘅感觉扯上嚟。就好似张被唔够长，夹硬扯缩埋训觉一样。麦兜本来就係咁简单，剧情越复杂，只会越发使人觉得只係一旧频能鸡。
有人推荐卢广仲嘅歌，初听反感，比佢所谓海豚音吓退。海豚音即係高音，1000个人里面总有一个，就好似1000个人里面仲有一个人条脷会好长。但不成气候嘅海豚音用嚟做标榜，其效果大抵就好似当众表演用条脷撩个鼻一样。
不过其实佢人类音嘅歌其实值得一听，对于呢种创作型歌手我总係十分尊重，即使不合我口味，例如方大同。但同样地，唔好以创作为标榜就得。年几前见到有只叫“林民龙”嘅专辑，林海峰、葛民辉，麦俊龙。成只碟就得一只歌，但係有五个版本。想当年嘅春光乍泄，我加加埋埋都净係听过五个版本，呢只何方神圣呢？结果我听咗两个版本后直接删咗，可怜软硬做臭自己个朵。
仲有詹瑞文今年嘅栋笃笑，依然无办法睇完，风格问题。最近似乎栋笃笑仲多过演唱会，林海峰都话要上广州做，只开一场仲收到好贵。我可以睇到嘅原因只有一个，黄子华12月底广州场爆满，林海峰只要定价比子华嘅黄牛价钱底，就点都唔算高嘞。但我只想讲一句，佢《三字头》之后嘅两张附属住栋笃笑出嘅CD，都无乜料到了。
最后，首尾呼应一下：
 October 26 惨剧 用咗唔够两个月嘅blackberry响洗衣机洗咗半个钟，係好无奈嘅事；唔係自己放嘅，更加无奈；洗嘅唔系自己嘅衫，更加无奈；仲係我提醒人地去洗衫，更加无奈。 简而言之，我提醒某人去洗一件佢自己嘅衫刚好件衫唔知点解会装住我部手机，于是就係咁。 blackberry同AT&T同时对于“浸水”呢个情况卸膊，同时指出呢个“浸水”係一个致命嘅伤害。然后好诡异咁讲，因为唔係用紧blackberry，原来果个上网套餐其他手机唔可以用。唔係呱…… 而与往常一样，最心痛嘅，係果个冗长而关键嘅电话簿…… 上网查，话讲手机埋响米里面，等米吸湿，过几日再试试。算唔算问米？ October 21 会过去的话咁快就三个星期。三个星期前，打波拗柴，顺便去医院睇，然后攞住医生纸申请临时残泊，即係，残疾人泊车牌。于是三个星期以嚟可以大摇大摆咁将车停响靠近办公室嘅地方。
期间仲小小咁撞咗一次车，左前个车碌撞驳，于是肽盘都歪咗。换胎矫正之类烧咗两百。最讽刺嘅係，我撞果个驳，呢两日发现已经成块拆咗！所以证明佢嘅存在本来就係一个错误，我只係好不幸咁同佢发生咗关系。
期间如上次所讲，搬咗办公室，然后开始变得无数咁多嘢做，12月份究竟可唔可以翻广州都变得不可预知。而机票已经无情地从8月底嘅900文，暴涨到1250。
不可预支嘅仲有份粮。暑假被克扣每月得一半，于是变得赤贫。今个学期又因为口语考试未过，每个月扣600，一个学期落嚟就无咗1.5-2个广州往返哥伦布。
Zyan结婚了，斯雅12月嚟紧，在催促我悬而未决嘅决心。此外年半无翻广州，可谓我人生以嚟最长嘅一次。而今次翻广州，又可以点呢？去睇睇羊炬又如何呢？
前日发梦，翻到井边巷嘅旧屋，出世后住咗12年嘅小平房。剧情好简单，入门同阿妈讲，我翻嚟啦，要调时差，好眼训，训先。然后就坐响地下，挨住沙发脚，训着咗。
原来，过去比人最大嘅感觉，就係稳定。同时，可以理解，点解有人突然觉得过去比人呃咗，係会恼羞成怒。有几怒，想象下你训着果阵有人係咁摇你张床，就可知一二。
过去，会过去的，广州，会翻去的…… October 06 非人性自动化或许因为老细嘅羽翼未满，爪牙又不够势众，于是成组三个人比人从计算机系8层高主楼嘅6楼，赶到隔离无穷楼龄嘅1楼，嘅万几伏高压电房嘅隔离。
号称新办公室，其实係旧时一个大电房切开三块，中间继续高压，两边原来估计用嚟缓冲高压辐射嘅区域，就变成新嘅实验室。于是究竟係我做实验，定係我比人做实验测辐射，就不得而知了。
设备係新嘅，于是网络係未连上嘅，无线网络都係仅仅覆盖到咁上下。
旧时6楼上8楼食饭，家下山长水远加之无微波炉无冰箱，食饭问题有待解决。
无打印机，楼层果个所谓公用打印机放响一个非公用嘅办公室，于是即使可以打都唔知点样攞。
有厕所，以前出门就係，家下行两分钟先到，饮多d水一日嘅运动量就已经足够。幸而经历过浙大教一要落两层楼先可以去厕所嘅日子，家下唔算乜。
楼层大门有锁，以前用ID开，家下要去领锁匙。
以前出走廊会见到系里面嘅海报同新闻，家下出走廊见到对面好似金工实习嘅一堆机械。
咁係咪无嘢好呢？唔係，新办公室有个好先进嘅感应器，当佢感应唔到里面有人嘅时候，会自动关灯，节约能源。
但係点解你个感应器装响门口而且同我隔住块板呢？係咪我过一阵就係起身跳只舞呢？
再次幸而……经历过，学校几个月前启用嘅新图书馆，都係去厕所嘅日子，家下都唔算乜…… 当日我坐响三日香嘅新厕所里面，突然眼前一黑…… 你叫我点样跳舞呢？ October 03 又到中秋 旧年中秋打风然后导致停电一个星期嘅惨剧相信我有生之年都唔会重现，虽然都因为诸多因素而不得已翻嚟学校…… 打电话翻屋企话外墙要翻新乜乜物物，迎亚运之类，于是导致成个屋企窗口封晒之余，楼下不断有人话有人入屋偷嘢。原因好简单，十分人性化嘅搭棚工艺，导致任何一个人都可以沿住外墙轻松上到八楼。当个贼可以坐响度工作嘅时候，所有嘅窗最好都要变成门…… 开始我以为亚运会多多少少都叫一件大事，虽然已经无人有兴趣去承办，呢个意味住亚运基本上就係一件聊以自慰嘅事，等广州市民，或者讲广东省市民都可以高兴下，在上海大搞世博之时不显得太没落。于是起个电视塔都无可厚非，点支蜡烛插朵花之类均可视作情调。相传该塔化名羊炬，亦与主题暗合。但本来应该关埋房门做嘅事，是否需要盛装加化妆呢？要迎接外宾，不如先谂谂点样服伺平时街边哥伦比亚巴基斯坦过嚟买皮具买童装嘅“外商”，以及动辄围攻公安局嘅唔知边度嘅黑鬼们。然后仲要化妆化到内伤，自慰到咁大压力，相信都唔会有乜快感了。 中秋都係咁话，阿妈问，今晚係咪要买餸煮饭啊？许，无乜心情，出去食饱算。过节何必要咁大压力呢？ September 21 阈值有时候做一样嘢，当持续咗某个阶段仲未达到效果嘅话，呢个效果可能就永远到唔到。简单如，数绵羊，如果你可以数到一百，你都可以数到一万。无奈如，颓废，如果你可以颓废一年，随时你会颓废一世。当然不一定，视乎呢个阈值有几大，于我而言，在凌晨通过所谓思考而使自己训翻嘅阈值约莫係半个钟。过咗半个钟，继续思考嘅效果，犹如七宗罪里面最后Brad Pitt用支枪指住条友个头一样，to 爆 or not to 爆嘅问题。区别只係我係自己指住自己个头。有句话叫做，当人以为自己在思考，其实係为自己嘅行为编造藉口。而家下我可能属于揾唔到理由训觉，或者就同被强暴嘅人揾唔到理由高潮一样，而同时果句“生活就像被强奸”嘅论调显然已经不足以为我嘅藉口。
于是我选择起身，睇下起身之后会唔会后悔。当然係因为，起身而后悔嘅代价，比起辞职或者分手要小的多得多，补救只係需要训翻落床。唯一嘅副作用就係空虚，主要体现在个胃。但我相信，饿都有个阈值，当我过多半个钟都唔食嘢，可能我就会唔饿嘞，因为个胃都应该会放弃。
我家下就放长双眼睇下我嘅衰弱嘅神经仲可以对寻晚杯咖啡坚持几耐。 |
|
|||||
|
|
